劉嘉玲前晚身穿性感晚裝欣賞時裝表演，近日盛傳其好友王菲和李亞鵬將於下月在北京舉行婚禮，嘉玲表示會祝福對方以及等對方寄發請帖，未知嘉玲前晚有否看中靚衫出席好姊妹婚禮呢？
劉嘉玲、薛芷倫、郭富城和黃家諾等前晚在淺水灣酒店出席「Gucci2005春夏系列時裝表演」，欣賞靚衫。嘉玲身穿價值約六萬六千元的低胸露背Gucci晚裝亮相，雖與模特兒撞衫，但身材豐滿的她更能展現曲線美。
談到王菲近日頻傳婚訊，嘉玲說：「我有同佢聯絡，但呢啲嘢都係問番佢本人。」問嘉玲準備買甚麼結婚賀禮？她說：「等我收到喜帖，到時先算。」
談到王菲男友李亞鵬，嘉玲大讚說：「我覺得佢畀我嘅感覺係《笑傲江湖》裏面嘅令狐沖，佢係一個好nice嘅人。」問嘉玲覺不覺得一對準新人很登對，她說：「點解唔問王菲問我？只要佢開心，我就開心，我一直以嚟好鍾意呢個女仔，佢開心我一定祝福佢。」
有報道指王菲婚後打算退出娛圈，嘉玲說：「無論佢有乜嘢決定，我都尊重同祝福佢。」那嘉玲可有意跟王菲一起舉行婚禮，她說：「情況唔同，大家想法又唔同，我冇諗呢一步，我感染佢嘅喜悅都好開心。」那她可會叫王菲添丁？嘉玲說：「佢咪有童童（竇靖童）。」據知王菲下月在北京舉行的婚禮進行得如火如荼，王菲日內更會發喜帖，當中賓客包括其前夫竇唯，估計賓客不少於五百人。
另外，薛芷倫駕駛「波子」到場，記者問她座駕是否裙下之臣所贈？她說：「唔好計邊個買，你哋要check一定check到。」薛芷倫直認身邊確有追求者，她說：「年紀冇所謂，我冇set條件。」
而城城將於五月舉行演唱會，談到許志安在早前的演唱會中又着T-back又露毛，城城說：「呢啲唔係時裝，呢啲係過份暴露，我要配合自己舞蹈員身份。」
採訪：梁錦雯、張俊銘
攝影：葉君海
