唐司長宣讀預算案，比較大膽之作就係取消遺產稅，值得拍手掌，其他稅務優惠，好少嘢啫，納稅人得益不太多。
千祈唔好以為取消遺產稅就係劫貧濟富，益晒啲有錢佬。事實上，有錢佬後人從來都唔使繳交遺產稅。何謂有錢人，定義各有不同。傳統上，millionaire譯做百萬富翁，有一百萬就係富翁。今時今日，講笑咩，市區一個細小單位上車盤都唔止一百萬啦。你行去太古城買樓，試吓用一百萬港紙，睇買到乜吖！擁資一百萬元，絕對唔係富翁，只係中產階級之下層，中產階級之中層算佢擁資一千萬，可能都係得益於二十年前在羅便臣道買咗一個單位，中產之上層，擁有兩三千萬元多一層樓，算唔多嘞。冇五千萬銀資產淨值，冇資格叫做小富翁。
會計師話，有五千萬資產淨值，就值得做離岸家庭信託，避晒啲香港遺產稅。五千萬元以下嘅，唔值得做家庭信託喎，淨係畀律師費、信託費、管理費，都唔合資產比例啦。故此在香港繳交遺產稅嘅，絕大部份係中產，唔係富翁。唐司長話根據稅務局統計，七成以上繳交遺產稅嘅，都係擁資二千萬元或以下，即係買咗兩層太古城大海景單位，供甩咗按揭之人，核心中產人士。
政府今次叫做益吓中產，其實最終益埋全香港。以後東南亞啲富商可以放心調資金嚟香港買樓買股票，唔使驚遺產稅，基金投資界、樓市、信託界應該好有得益。取消遺產稅犧牲咗十五億元稅款，可以從新嘅經濟活動搵番。附近周邊國家地區紛紛取消遺產稅，如果香港唔追上時代，就會落後於人，失去競爭力！