香港賽馬會主席夏佳理早前出席中大嘅EMBA論壇時透露，佢細細個已經鍾意賭馬，佢喺英國讀法律嘅時候，就係由賭馬嘅成績，決定佢下一餐食齋菜抑或食牛扒。佢好坦白咁話，結果都係食菜多過食肉。
佢又講吓馬會嘅賭波生意，第一年做賭波，多咗百六億元收入，最搞笑嘅係馬會頭幾個月收集到嘅意見發現，原來啲顧客比馬會員工，重熟悉足球同埋賭波。好彩，馬會首年嘅營運好順利，因為○四年嘅歐洲國家盃爆出大冷門，佢重話每次大冷門跑出，莊家就會賺得多。喺嗰項賽事，馬會賺咗成三十三億。
喺論壇度有人問夏佳理，點解馬會嘅捐款每年變化好大，夏主席答得好得體重幽咗班立法會議員一默。佢話捐錢數目上落大，係由於佢哋靈活，因為馬會係按計劃捐錢，佢舉咗○三年沙士爆發做例子，學校要復課，家長擔心學校衞生設備唔夠，馬會幾日就撥咗億二畀政府，等所有學校喺復課前，改善洗手間設施。佢又話，嗰億二真係倒咗入大海，因為只係用嚟洗手。如果政府交畀立法會討論呢件事，啲議員可能到咗今日都未有共識，不如由馬會做主動，政府當時都話呢個建議好。
傳真︰2623-9278
電郵︰[email protected]