今時今日做政黨真係唔簡單，東隧瘋狂加價呢單嘢搞到民怨民憤，各大小政黨好似聞到血腥嘅鯊魚咁不斷追擊，連過去被譏為只識搞「簽名（運動）、靜坐、示威」三部曲嘅民主黨，今次都識得搞番啲出位嘢。噚日佢哋就大手筆搵咗架爛車喺東隧附近扑爛佢，以示寧願扑爛架車，都唔畀東隧㩒住搶咁話。「幕後黑手」范國威話，今次使咗一千八蚊搵間拖車公司喺劏車場搵咗呢架殘車俾佢哋蹂躪。
至於另一批由觀塘區議員組成嘅「創建聯盟」，則只係踩單車去東隧交抗議信，論喺傳媒鏡頭前嘅效果，民主黨扑爛車似乎有睇頭得多。范國威話，都有諗過踩單車，但覺得唔夠激，都係扑爛架車先顯示到民怨沸騰；佢重大讚間拖車公司服務一流，搵爛車之餘重包埋送貨，扑完後又拖返架車走，唔係都唔知點處置架爛車。至於民主黨死對頭民建聯，今次就慢半拍，今日先搞慢駛遊行，輸咗個馬鼻Lu。
傳真︰2623-9278
電郵︰[email protected]