元華出身自七小福，做過武師，做過李小龍的替身。現年五十五歲、拍片無數的他近日終奪得人生第一個獎項，他不諱言這是演藝事業的美麗記號，是遲來的春天。提及印象最深刻的人，他直言是李小龍，因李小龍令他有過不平凡的美夢。
元華於今屆「金紫荊頒獎典禮」中，憑電影《功夫》包租公一角，勇奪「最佳男配角」，為其演藝事業留下美麗記號。元華出身自七小福，跟成龍、洪金寶和元彪等屬同門師兄弟。
從小跟功夫結下不解緣的元華，做過武師，做過李小龍的替身，又演過無數大反派，認真是打人無數，想他必猜想不到，竟憑飾演被老婆元秋打到飛起的退隱武林高手一角，獲觀眾和業界認同，得到人生第一個獎項，華哥笑言它是「遲來的春天」。
日前華哥接受訪問時說：「好坦白講，《功夫》算係我人生嘅一個記號，佢咁賣錢，又咁轟動，真係令我人生階段錦上添花，正如羅蘭姐話齋『有獎唔怕遲』，我當係遲來的春天。」那他可有信心在即將舉行的「香港電影金像獎」中再下一城呢？華哥謙稱從沒想過得獎，因獲獎與否很大程度是靠運氣。
很多演員跟周星馳合作過後，均認為他難相處，問華哥可有同感？他反問說：「有乜嘢咁難相處？唔係每一個都要好相處，大家係朋友，睇吓係點相處，究竟係佢要求高、難相處，定私人生活難相處。我只feel到佢係要求高嘅人，要求高到有時唔知佢要乜嘢，做到時先知原來咁簡單。」
不過在華哥心目中，有一個演員令他至今難忘，就是一代武打巨星李小龍。華哥描述當年他們的軼事時說：「我當年喺《龍爭虎鬥》中做過佢嘅替身，喺另一套《精武門》我就做演員同佢對打，當年係佢揀我做佢替身，我都唔知點解，不過我覺得佢個人好好，好和氣，重成日同我哋飲茶傾偈。」
其後李小龍打算往荷李活發展，他率領十位武師跟他一起赴美打江山，元華是其中之一，豈料未成行，李小龍就已經逝世，令元華失去赴荷李活的機會，但他沒有為此失望，他說：「因為就算過咗去，之後係點都冇人會知，呢啲事冇人能預料。」
至於與其他六小福的感情如何？華哥說：「細個嘅感情，係要大個至感覺到，細個鍾意就friend啲，唔鍾意就唔friend，大個咗唔係疏離，只係各人工作時間唔同，𠵱家啲老闆唔會一次過要晒七小福，不過我哋都會兩至三個月約出嚟聚一次，但最近真係少咗，因為大家都太忙。」
撰文：馮美茵
攝影：林德雄
服裝提供：香港西武
