「大長今」大熱，帶挈旅遊業，永安旅遊（2965）（新股編號，舊股1189）有得諗。莫以為「無厘頭」，呢期韓劇「大長今」熱爆燈，香港旅業界包括永安在內，即刻推出「大長今」相關景點旅行團，視為食腦；據報載，香港市道好轉，今年港人復活節外遊，70%都揀豪華團，加埋長今熱，韓國團有唔錯表現。旅遊股係受惠市道復甦，但遭市場忽略一族。
香港上市主打係旅遊股，得兩隻揀，唔係永安就係星辰（542），星辰交投淡靜，無得搞；主打永安，自從去年11月外資大孖沙德意志坐鎮，有名牌效應，活躍好多。家陣德意志揸住永安9.74%，估計平均成本價同永安現水位2.1元差無幾，大孖沙落叠，斷估唔係着眼於區區一兩成水位。
永安上星期二100合1，已發行股數由之前400幾億股，去到現時4億幾股，股價企硬合股前水位，冇似以往仙士股，一合股就跳水迹象，入市後，以大孖沙增減持紀錄定去留，唔錯得去邊。
安寧數碼（128）上星期前四個交易日，冇乜發市，上星期五忽然大成交，上到九球股數，又講兩點。第一，安寧04年中期（6月止）手頭現金5.84億元，完全冇銀行借貸，每股淨現金0.35元，高過現價（0.315元）。星期五，銀行突然玩加息，淨現金股會係短線炒友選擇。第二，安寧最近兩個幾月，整咗個平底三角，上阻力0.34元左右，突破阻力，應該可以一試量度升幅0.43元，呢個水位，同安寧每股資產值0.54元，講緊重有折讓，冇炒過龍。又係嗰句，呢類股仔，手快有，手慢無。
錢雋