港股噚日早段曾升至13900，但高位有沽壓，午後傳出滙豐將宣布加息，而下周又會再加多一次，令大市回得更急，恒指收報13828，升10點，成交172.39億元。
滙豐於收市後宣布加息，優惠利率由5%加至5.25%，供樓人士又要供多些少。
阿虎重以為中信泰富（267）榮老闆要買起紅隧是大想頭，點知原來港府其中一個方案是購回東、西兩隧或將紅隧拱手相讓。嘩，如果真係俾榮總如願以償，唔知日後過海時使唔使向榮老闆申請個Visa先呢？中信泰富噚日再升1.28%至23.70元。
吉化（368）去年純利25億元人民幣，勁升495%，但不派息回饋股東，令人覺得管理層對前景不樂觀，而油價高企肯定令吉化成本增加。期內總營業額中有36.3%是來自向母公司中石油（857）出售產品，令人懷疑業績是否真係咁正。結果，吉化昨日遭大戶洗倉，勁跌15.25%至2.50元，成交高達7.28億元，僅次於滙控（005）成為第2大成交股份。
盛傳想做藍籌的東方海外（316），噚日果然努力向上，股價再升6.4%，收報38.20元，市值升至216.2億元，已經追過第32位的駿威（203）。
深圳中航（161）發盈警，預料錄得投資減值損失，令去年業績受重大影響，股價應聲大跌7.5%，收1.23元。
富豪（078）近排頻頻與證券界會面，既講香港酒店發展，又講澳門項目。缸邊則有傳聞話富豪隨時會伸手抽水。
阿虎