話說某天，一直為半歲的哥基犬太郎搵老婆的ChingChing，終於搵到才兩個月大的愛子，帶返家過童養媳的生活。所謂初歸新抱，落地孩兒，愛子好應聽教聽話，奈何她天性活潑兼頑皮，從此一家就多事了。
記者：邵超
攝影：蔡鴻雯
（左）姓名：愛子
品種：哥基
性格：活潑、勁奀皮
專長：handhand、睡姿奇特
（右）姓名：太郎
品種：哥基
性格：善解人意
專長：handhand、看店
奶奶ChingChing原意是找一隻像太郎般雙色的哥基犬女，最後都係一句「眼緣」，看上了黑白啡三色的愛子。更難得太郎也很愛錫愛子，所以話「父母之命」有時都未必太壞。不過教新娘的任務，似乎任重而道遠，愛子還是頑皮依舊。
花園幽會
他和她的蜜月期
太郎和愛子結婚已九個月，現時十一個月大的愛子可能遲熟的關係，仍未「起水」，所以未能進行交配。在這段拍拖期內，ChingChing發現太郎和愛子有個習慣，每晚放狗時間，兩公婆都會各自展開社交生活。「兩個會分開同其他狗玩，但愛子見到太郎同其他狗傾偈，就會走過去八卦，相反太郎就唔會咁做。」
活潑的愛子對太郎愛護有加，當太郎被阿媽（ChingChing）罵時，她會做「架良」，鬧番ChingChing。但太郎就好醒目，知道ChingChing鬧緊愛子，就唔會走近，免得殃及池魚。「女人」真偉大！
一條藤條教巧婦
「佢哋兩夫婦平時好鬼恩愛，成日舔嚟舔去，你追我我追你，有時互相揩吓，見到陌生人（例如攝影師同記者），愛子就會好奇。不過兩個就唔會行埋一齊，怕俾人見啩。」ChingChing還說，太郎第一次見愛子，已經在她的籠外屙尿，留下「佢係我老婆」的劃地盤證明。
「太郎係醒目仔，做錯事佢會做個慘樣，話畀你知佢知錯。但愛子就唔同，喝停佢猛咁叫『No』，佢重會做個得戚表情，好似反問你『乜我有錯咩？』激死！」終於愛子就吃了一頓「藤條燜豬肉」。ChingChing表示適量的體罰，可以劃清主人與寵物的界線，不能讓寵物駕馭主人，反客為主。
七狗咁亂
本身經營狗時裝店Puppygonia的ChingChing，屋裏養咗七隻狗，樓上天台住有拉布拉多犬Mimi和雪橇犬Jacky，與太郎、愛子同居的則有松鼠狗HeaHea、比高犬Gubi和約瑟犬Yogi。七狗爭寵事固然少不了，所以頑皮的愛子在大家族裏，並不能為所欲為。「愛子同其他狗都OK，同Mimi重會錫錫㖭。HeaHea已經14歲，係老人家，鎮得住愛子。平時開飯每個都有私家兜，但分零食就會按輩份，最先係HeaHea，最後輪到愛子。」大部份狗都有機會返店裏幫手做狗時裝模特兒，太郎甚至有Fans，但未定性的愛子相信要假以時日。
一狗治一狗
ChingChing繼續解說這個大家族：「屋企裏多數係自來狗，Gubi的社會地位比較低，但一啲都唔蠢；愛子食得慢，Gubi食完會走埋去愛子個兜度偷食，但愛子一定晒牙兇佢，佢惟有死死地氣走開。有時最好牙力的太郎咬完骨頭，轉頭走去同愛子玩，Gubi就會趁太郎唔為意時搶走咬軟咗嘅骨頭，坐享漁人之利。」
要數愛子最怕的狗，應該就是Jacky。第一次見面，Jacky已經用手擒牢愛子，算是下馬威，之後只要Jacky心情好，愛子逗牠玩也會睬呢。這樣算不算一狗治一狗？
記得當時年紀小……
大家族對愛子的評語
