今個星期有七人欖球賽舉行，大把基金經理、經紀，飛嚟香港開會。華爾街老牌經紀G都嚟咗，出席瑞士第一波士頓嘅投資會議，佢話會議由星期二至星期四舉行，開完會就返美國。左丁山問佢：「乜唔留低睇埋七人欖球賽呀，一波冇請你去坐box咩？」經紀G突然問：「乜嘢叫做七人欖球？一波冇請我喎？」只得向佢解釋一番，七人欖球類似七個人打美式足球，佢先至明明地。
電影製作、攝影界大哥W嘅千金去紐約做基金經理，與經紀G相熟，因此大哥W請客，介紹經紀G畀老友認識。經紀G於一九五四年畢業於耶魯大學，佢阿爸於一九二七年畢業，佢個女在八十年代畢業，三代都係耶魯人，經紀G一九五五年到華爾街，至今五十年，從來都冇諗過退休。經紀G講：「我五十歲生日之時，覺得自己人到五十，已經老咯，冇乜心機，開始為退休籌謀。一日見到一位華爾街行家，佢已經七十四歲，工作咗五十三年，佢話畀我聽，lifeisspeculative，唔使計劃得太緊要，今日唔知明日事，最好就係緊守崗位，勤力工作，無愧於人。佢同我都知人生在華爾街，就係speculative，冇得估嘅。好多經濟專家、分析專家預測杜瓊斯指數、股價，全部都係估錯嘅多，估啱嘅少。於是我開咗竅，不再為年紀憂慮，日日返工，都唔知幾開心。」
一九五四年畢業，今年應該有七十二歲咯，經紀G仍然思路清晰，說話有力，重想過嚟香港研究中國有乜增長股（growthstocks）可以投資！佢話𠵱家嘅中國好似十九世紀末期嘅美國，充滿發展機會，亦到處是騙人陷阱，當年美國呃咗好多歐洲資金，今日中國亦呃咗好多歐美資金，歷史不斷重複，見怪不怪，唔使因為咁而怕咗到中國投資喎。