《博愛歡樂傳萬家》昨日舉行拜神儀式，表演嘉賓譚詠麟避談與姨太同遊曼谷一事，卻乘機取笑田亮，指他與吳敏霞在車廂食蛋撻是研究及示範國家隊高難度動作，認真抵死。
慈善節目《博愛歡樂傳萬家》今晚在無綫將軍澳電視廣播城舉行，昨日司儀伍詠薇、梅小蕙，表演嘉賓古巨基、鄭少秋、譚詠麟（阿倫）、李克勤、關心妍及許懷欣等均有出席在電視城舉行的拜神儀式。
阿倫日前被傳媒拍下與姨太一同打高爾夫球，對此他笑說：「好彩係影到打高爾夫球，唔係食蛋撻。」他又說：「我知田亮好有上進心，因為佢離開咗國家隊，想知國家隊有乜新難度動作，所以喺車廂入面研究、示範，佢驚自己甩咗個課程。食蛋撻係好難，啲蛋撻碎好易食到成車都係。」
其後記者再問譚詠麟與「二奶」被拍下同行曼谷一事，他說：「咁難聽，點講呀！」那麼應該如何稱呼呢？阿倫說：「等第日話你哋聽！」問他是否學董建華等適當時候才交代事件，他說：「係呀！到時話你知，等我事業有成先啦！」
早前古巨基與歌神許冠傑上契，昨日基仔則與歌神兒子許懷欣相遇，兩人即寒暄一番，又互相交換電話，問古巨基誰是「契弟」時，他說：「唔好咁講，大家後生仔，叫名得啦！不過，我唔知邊個大啲。」
古巨基七二年出生，而許懷欣則是七六年出世，今年二十八歲，所以年紀較輕，問他知否自己是「契弟」，許懷欣即笑說：「我知道爹哋同佢（古巨基）上咗契，我唔知契弟點解，應該係兄弟咁嘅意思。咁因為上次佢幫爹哋做騷，我都有同佢傾偈，我覺得佢唱歌好勁。」
採訪：楊潔雯 攝影：陳偉權
