馮仁昭四圍超：
理工準碩士代AV女優三點式遊街

男子組合Shine、周俊偉、曾國祥同董敏莉等，前日去咗旺角宣傳新戲《AV》，該片嘅日籍女優天宮真奈美冇嚟宣傳，所以電影公司就搵咗落選港姐林艾瑩着住三點式喺戲院門口派電影花絮嘅VCD谷宣傳，有惹火靚女出現，果然吸引咗過百途人圍觀。
馮仁昭見到現場好多男士都眼甘甘咁望住林艾瑩，又爭住攞佢派嘅嘢，場面幾混亂，林艾瑩有啲尷尬，佢話：「我事前都知要着比堅尼，俾啲男人望實都OK啦，我𠵱家讀緊Poly嘅master，啲相會登出嚟㗎？我唔想畀學校知。」
Shine全程都好避忌，一眼都冇望過林艾瑩，佢哋話怕尷尬。Shine又話同女優天宮拍戲時，全體男工作人員都冇生理反應，徐天佑話：「做AV女郎好慘，但佢哋好專業。」

身藏避孕套
另外，周俊偉同曾國祥之後繼續着住浴袍去銅鑼灣宣傳，曾國祥喺換衫時，忽然有個避孕套喺佢件衫跌出嚟，大家都以為佢一陣會有餘興節目，曾國祥解釋係之前喺旺角派避孕套時，其中有一個避孕套夾咗喺VCD封套度，冇留意到啫。

Twins狂食甜品減壓
Twins近日喺台灣宣傳新碟，做節目重要入境隨俗扮台灣人講台語，不過Twins話最鍾意係用台語問人「幾多錢」，因為佢哋鍾意買嘢。不過可能工作繁重，Twins嘅食量亦變得愈嚟愈大，阿嬌有時食完晚餐重可以再狂食甜品，不過阿Sa就話成日做運動，所以唔擔心會肥。

方力申專儲阿嬌唱片
方力申同Twins成員鍾欣桐（阿嬌）嘅緋聞重傳得如火如荼，雖然方力申噚日去電台嘅活動，冇玩到塔羅牌嚟預測同阿嬌嘅戀情，但佢就坦白承認話有儲Twins嘅CD，對於Twins推出咗新碟，佢話：「作為朋友，唔使叫都會買嚟支持，我都有儲佢哋嘅碟。」阿嬌聽到真係心都甜咯！

容祖兒捱苦增強戰鬥力
容祖兒噚日去港台「香港電台聲援行動」，今次個活動係將收音機捐去斯里蘭卡同印尼亞齊省等受海嘯影響嘅地方，容祖兒重話𠵱家想去呢啲地方，佢話：「其實我一直都好幸福，所以佢哋遲啲去探訪，我都好想去，我想令自己多啲體驗，捱到幾日都可以令自己變得堅強！」

徐小明送別黃錫照憶訓誨
亞視前高層黃錫照早前病逝，享年七十九歲，噚日喺沙田寶福山出殯，好多佢生前嘅同事同好友都嚟送佢最後一程，鮑起靜即場落淚，而由黃錫照一手提攜出道嘅徐小明重負責扶靈，佢話謹記黃錫照嘅教誨，徐小明話：「係黃生畀咗好多機會我喺電視發展，教我電視同電影唔可以混淆，要由基層學起，否則唔會了解呢兩樣嘢。」

蔡依林失戀旺事業
通常啲人話愛情失意，就事業得意。蔡依林似乎就係咁喇，佢喺周杰倫同侯佩岑嘅戀情上似乎係失敗者，但係佢嘅事業運就愈來愈好，佢出嘅書好賣過大S嘅書，連佢有份做嘅節目都創收視新高。蔡依林嘅唱片重會喺四月尾推出，同F.I.R撼過，相信蔡依林大有機會乘住個勢打敗佢哋。