滙豐銀行舉辦嘅商業計劃設計比賽，三支大學生隊伍噚日參加總決賽。攞冠軍嘅科大理大聯隊嘅設計係一個流動電話身份證明系統，顧客只要用手機就可以喺店舖攞優惠，唔使成日袋住成叠會員卡出街。
艾爾敦怕3G洩行蹤
評判之一嘅小超人李澤鉅就好自豪咁話，旗下集團早喺六個月前已透過3G技術提供類似服務，唔單止免費，重要係用MMS（多媒體訊息），有埋影片睇，比班學生建議用SMS（文字訊息）高出一皮。
班學生唔認低威，反駁話佢哋計劃比較全面，同李生嘅定位唔同，唔單止涵蓋3G電話，而且SMS嘅費用比MMS平，三位隊員重諗住攞三萬蚊獎金去落實呢個計劃，實行同李生搶生意。
講講吓滙豐主席艾爾敦（Eldon）突然擔心起嚟，問小超人如果用3G，老婆會唔會隨時追蹤到自己嘅行蹤，小超人見Eldon咁憂心，就話一定要得到佢認可先可以咁做，不過如果Eldon部手機係佢太太出嘅就冇計，因為佢哋公司只會服從顧客咁話，聽到Eldon好唔安樂，但Eldon好識做，即刻轉口話自己公司都係會服從顧客嚟打圓場。
至於得季軍嘅隊伍就諗咗部快速修甲機，啱晒啲唔鍾意等修甲嘅人士，而且只需幾十蚊，但係唯一女評判史美倫擔心部機會整傷指甲；至於小超人，因為太太係鋼琴家，所以唔可以留長指甲，所以都冇乜需要修甲，連幾十蚊都可以慳番。
傳真︰2623-9278
電郵︰[email protected]