早前曾與ChristinaAguilera及Pink翻唱《情陷紅磨坊》主題曲《LadyMarmalade》而攞咗格林美獎嘅二十九歲黑人hiphop女歌手Lil'Kim，佢喺○一年發生嘅一宗槍擊案中作假證供，前日紐約法院裁定佢作偽證、同謀犯罪等四項罪名成立，最高刑罰係入獄二十年，而佢有可能係史上首位知名女饒舌歌手面臨踎監命運。
話說Lil'Kim喺○一年二月底同佢嗰班助理喺紐約一間電台做完專訪後，同hiphop組合Capone-N-Noreaga成員發生爭執，最後演變成槍擊事件，有一人受傷。當時Lil'Kim出庭時向陪審團講大話，話佢唔知道呢單槍擊案。不過警方事後喺附近大廈嘅保安影帶發現Lil'Kim喺槍擊案發生時原來企喺馬路度，肯定睇到事發經過。之後Lil'Kim就俾紐約警方控以八項包括同謀犯罪、作偽證、提供假證供及妨礙司法公正等罪名。
經多月嚟嘅審訊，法官前日裁定Lil'Kim作偽證、陰謀犯罪等四項罪名成立。雖然案中最嚴重嘅妨礙司法公正罪，俾Lil'Kim律師打甩，但有美國法律專家幫佢計過，以上嘅罪名足以令佢判最高二十年嘅刑期，而佢使唔使踎監，一切都要睇六月二十四日嘅宣判。
事前曾話過贏面好高嘅Lil'Kim，前日聽審後扁晒嘴咁離開法庭，佢喺離開法院時一直拒絕發言，事後佢嘅唱片公司AtlanticRecords發表聲明，話會全力支持Lil'Kim，重話考慮上訴。