恒指升10.4點，全靠成份股中海油（883）升0.125元帶起16.5點。國指跌2.2點，接近7成國企都回落，指數跌得少，全靠兩隻石油股中石油（857）與中石化（386）分別上升7.5仙與2.5仙，總共拉動國指19.4點。窩輪龍虎榜上，盡係石油C輪，但高價追唔過。
中石油C輪：炒中石油C輪，要計埋正股股息因素，末期0.148元人仔，折合股價2.8%，揸中石油C輪，要將溢價打大呢個百分率。隻3610算係數據比較靚嘅，05年12月底到期，輪價40.5仙，溢價1.7%，槓桿率12.3倍（有效7.8倍），引伸波幅18.5%，要買，都最好等正股回落先至做。好幾隻中石油C輪，槓桿率的確好爆炸，但畀到5%以上溢價，冇得諗。
中海油C輪：中海油C輪交投欠活，最大金額嗰隻係3622，但亦只係5球幾。3622喺6月尾夠鐘，輪價20.7仙，溢價6.8%，槓桿率21.7倍（有效9.9倍），引伸波幅27.3%。
中海油未宣布末期息，計埋股息因素，隻輪溢價過高，高價追貨風險大。
中石化C輪：中石化C輪勉強可以諗嘅係2241，6月尾到期，輪價20.1仙，溢價2.4%，槓桿率16.9倍（有效10.3倍），引伸波幅22.3%，數據好過上便中海油C輪3622。不過要博都係等陣先，急升之後上車有風險。
華能C輪：華能（902）業績麻麻，但末期息0.25元人仔算唔錯，不過息高對C輪不利，除非息高令到好息股民搶高股價。華能是日冇郁，企定喺5.95元，但有成交嘅C輪隻隻升。咪亂追，個別10%以上溢價，加埋股息因素相等於溢價14%，你買埋我份。
章盛