葉蒨文前晚在紅館舉行演唱會，入座率僅得八成，但穿上性感戰衣上陣的葉蒨文未有理會，仍舊忘情勁歌。而到場睇騷的霍啟剛被問到郭晶晶時，即耍手擰頭，與母親朱玲玲飛奔到後台。
葉蒨文與香港管弦樂團前晚在紅館舉行「港樂×葉蒨文Live」MusicinMotion演唱會，葉蒨文的雙親、好友朱玲玲和其子霍啟剛及房祖名等都有往捧場。
問霍啟剛為何不帶女友郭晶晶來看騷？他說：「今晚係葉蒨文個騷，留番多啲版位寫佢，讚佢多啲，多謝關心。媽咪之前都有陪葉蒨文打羽毛球，唔該晒。」記者再三追問他有關郭晶晶的問題，他即耍手擰頭：「我唔講自己嘢。」再問他對郭晶晶落選日前深圳頒獎禮中的「十佳運動員」的看法時，兩母子即離座返回後台。
葉蒨文前晚以多套性感戰衣上場，當她換上一套露腰裝時說：「我唔可以太郁動，怕有嘢走出嚟。」而為了紀念黃霑，葉蒨文選唱了《晚風》，舞台螢幕同時播映黃霑片段，葉蒨文說：「我每次唱都好似有陣暖風吹住我，記得第一次見霑叔係凌晨四點半，去佢屋企聽歌，佢好興奮，成日講鹹濕笑話。我想話畀霑叔聽，我永遠記得佢。」葉蒨文繼而向螢幕致敬。
安哥時，林子祥出來跟太太葉蒨文手拖手合唱《Somethin'Stupid》，葉蒨文說：「大家畀啲掌聲鬍鬚仔。」兩人又在台上親吻，表現癡纏。
完騷後，葉蒨文在後台接受訪問，對於演唱會首場入座率只得八成，她說：「呢啲冇得唔開心，我會做到最好，咁入場嘅觀眾睇得開心，但就唔會諗冇買飛嘅人。」葉蒨文表示阿Lam事前不知道她的性感衣着，至於為何二人會選唱《Somethin'Stupid》，是否阿Lam要取笑她愚蠢？葉蒨文笑說：「等我返去問吓佢先。」
採訪：李珮洳 攝影：葉君海
