金沙噚日喺澳門街搞大Show，公布佢哋嘅超級無敵發展大計。咁啱澳門賭業龍頭股之一的新濠國際（200）亦停埋牌，加上嘉華國際（173）同嘉華建材（027）重停緊牌，一時間濠賭股突然好似消息滿天飛。
經紀陳引述江湖傳聞，話新濠唔係有新項目，可能係增持現有項目權益而已。至於世紀建業（079）在連續兩日大成交後，終於傳出傾緊的酒店連賭場項目即將落實。經紀陳話，聽講規模唔係太大，但有人由叠馬仔變身為賭場老闆，都咪話無意義。
世紀建業昨日高見0.34元，收0.305元，冇起跌，成交股數高達1.8億股，金額5757萬元。
至於買咗兩間澳門酒店後就一路好靜嘅邁特科技（1031），經紀陳話古仔未完，邁特即將改名做黃金集團，表明正身，當酒店交易搞得七七八八之後，就會出發做路演，見吓四方投資者。
邁特股價由高位0.60元跌到𠵱家，足足有成50％咁多，近排在0.30元水平企得甚為硬淨，所以現階段博反彈都有得諗，但就要嚴守止蝕位。
慕容小初