張燊悅與雷頌德七年地下情告終後，人生也重新開始，據知早前她榮升業主，斥資約四百萬購下北角半山新居，近期又與從事空運業的圈外男友公開戀情。張燊悅坦言八年來從未試過與男友拖手仔出街，「原來好有滿足感㗎！」
張燊悅（Nicola）和雷頌德去年結束七年地下情後，有報道指她希望釣金龜婿，不過近日其真命天子終於出現，新男友年屆二十八歲，與Nicola同齡，現職空運業，是名打工仔。
提起釣金龜婿，Nicola即說：「我一路俾人誤會，其實係有次做訪問時，我話想好似張玉珊咁能幹、咁有錢、咁有成就，點知寫出嚟就變成做有錢人係我目標。啲人咁講，其實我個心好難受，我最怕啲大家族㗎啦。搵個乜都有嘅人，佢畀到任何嘢我，聽日佢一樣可以畀到第二個女仔，但搵一個可以一齊有經歷、長大同分享嘅人，就會好堅固，呢啲愛情至獨一無二。」
Nicola與雷頌德相戀多年，雷頌德應可為她分享喜與悲？她說：「某程度上係，總之我希望錫嘅人開心，佢開心我就開心。」入行八年來，Nicola從不承認有男朋友，這次卻大方公開戀情，她說：「一段關係係有兩個人嘅成份，最重要係大家有共識，今日搵到個男朋友唔介意、有共識，咁咪話畀人聽囉，會尊重佢嘅決定。」自從宣布拍拖後，Nicola表現得很開心，她說：「一個普通人拖住手拍拖係冇嘢嘅，但對藝人嚟講就好唔簡單，原來好有滿足感㗎。」
踏入新一年，Nicola除了情場得意外，據知早前她更耗盡積蓄，購下約四百萬的北角半山物業，首次榮升業主，對此她只承認確已置業，並說：「畀咗首期咋，重要供，所以要畀心機做嘢，我遲吓都要返內地拍劇。」
採訪：朱倬誼 攝影：葉君海 服裝提供：a.y.k
場地：F.C.K（CausewayBayFashionIsland）
髮型：LingChow@HairIDE
