近日再為人父的張學友，昨日在家邊餵剛出世的細女吃奶，邊接受商台節目電話訪問，他表示BB出世時有七磅重，但是仍未改名。學友說：「今次想改咗英文名先再改中文名，英文名應該會係Z字頭，未必同大女一樣有個『瑤』。」主持人笑謂BB及時出世，因為財政預算案的子女免稅額提高，學友即笑言：「梗係啦，我哋呢啲搵着數嘛。」
訪問中學友的聲音帶點疲態，他表示為湊女變得「冇覺好瞓」，因為已有一段時間沒湊初生嬰兒，現在只懂餵BB和換尿片，沖涼則要再學習。至於再添一名女兒可會感到興奮，他說：「都冇預到會生BB，如果唔係就唔會安排咁多工作，呢次都算係意外。」現時學友湊女之餘，亦顧及大女張瑤華的感受，他說：「有啲家長朋友話要小心啲，有啲人探我哋都會買份禮物畀佢，相信大女要啲時間適應有個妹。」