隔晚美股唔妥，港股昨日開出自然唔多好睇，恒指最多急挫132點，埋單微跌14點，低位承接力好強，市底似乎唔錯。長實（001）早段70.25元，收71.50元，進帳0.50元，喺1.25元反彈幅度中，熱門C輪3560由17.1仙彈上25仙，升幅高達46%。新地（016）低位72元，彈上73元收市，只係進帳0.25元，但熱門C輪4643已由34.5仙彈上46.5仙，升幅35%。大地產股熱門C輪升突，可視為後市睇好嘅訊號。
和黃C輪3808：長實靚，長實C輪跑贏正股，和黃（013）企定喺67.50元，冇升到，估計會由長實帶住上番去，可以諗吓搵啲C輪短炒。
𠵱家正路之選係3808，7月中到期，輪價32仙，溢價4%，槓桿率21.1倍（有效10.9倍），引伸波幅21.2%。3561亦係熱門之選，但暫時係3808贏幾個馬鼻。
恒指C輪3795：如果同意市底唔錯嘅睇法，可以留意收啲恒指C輪，不過仍然係高追不宜，遇有壞新聞入市恒指跌低之時低位買貨比較穩陣。中度爆炸力與殺傷力之選係3795，7月尾到期，輪價17.6仙，溢價2.5%，槓桿率18.1倍（有效11.1倍），引伸波幅17.5%。搏殺之選係3505，既然係搏殺，一兩日之間，可以賺20%亦可以輸20%，上車之時要先有思想準備。
中移動C輪3750：中移動（941）彈力好強，低見25.95元後彈上26.30元收市。下次見中移動回吐，低位買C輪3750，7月到期，數據唔錯，個個位有買賣對手，唔怕蝕擘價。
章盛