AC前鋒基斯普最近意氣風發，不但喺歐冠盃十六強兩回合各入一球、淘汰曼聯入八強；擒晚意大利盃對烏甸尼斯，基斯普冇出米蘭就即刻「瓜柴」。
阿巴莫域治當然知道佢呢排好掂喇，即刻食住個勢提高佢嘅轉會費。原來車路士借基斯普畀AC後，雙方傾過，如AC試用完覺得掂嘅話，可以用七百萬歐元加湯馬臣同佢「贖身」，點知車仔𠵱家就加價到一千二百萬歐元（約一億二千五百萬港元）。
我求大俠醒起，阿巴莫域治當初點解會咁好死借基斯普畀AC、重分擔埋佢部份年薪（全數約四百五十萬歐元）㖭？原來係想等佢升值後「甩手」賺番筆。不過AC講明唔會畀咁多錢買一個就嚟三十歲嘅前鋒嘞。
日前，基斯普重揚言要喺歐冠盃打低車仔「報仇」，𠵱家車仔就即刻做嘢搞亂檔。睇住基斯普可能成為「磨心」，我求大俠都替佢擔心，希望佢最後唔會兩頭唔到岸喇！
碧根鮑華重大想頭
碧根鮑華大戰柏天尼！呢兩位唔同年代嘅球王當然唔係要「隻揪」咁失禮喇！原來佢哋可能一齊競選下屆歐洲足協會長個位。繼法國球星柏天尼日前表明去馬參選後，德國足總亦推出國寶碧根鮑華出戰，但「凱撒大帝」就話唔想選，點解？因為國際足協會長先係佢終極目標囉。
布洛堅蹺起烏克蘭
烏克蘭名宿兼國家隊教練布洛堅因無法身兼兩職，故辭去國家隊份工，專心做國會議員。我求大俠就感到可惜，話晒烏克蘭好有機會殺入明年世界盃決賽周；家吓希望烏國足總游說到佢留任到踢完外圍賽，否則對球隊士氣好有影響。講到尾，好多人都希望舒夫真高踢到世界盃。
新會徽似車仔望紅
倫敦市今年有車路士、查爾頓同水晶宮創會百周年，大家都會搞搞新意思，水晶宮就推出周年紀念品，重畀球迷選世紀最佳陣容，愛華頓嘅門將馬田亦有份。不過我求大俠再睇佢哋個百周年紀念會徽，同車仔一樣係圓形好相似，怕且成績同財力唔及車仔，亦希望其他可睇齊。
河升鎮跟明哥學嘢
大勇嘅火箭噚日喺主場大炒拓荒者成三十一分，一面倒嘅比賽當然冇睇頭，較有趣嘅反而係中韓兩大巨人：七呎六嘅姚明迎戰七呎三嘅河升鎮。前者好輕鬆就攞咗十三分同七個籃板，至於新仔河升鎮就只係響垃圾時間上陣五分鐘得兩分；睇嚟佢重有大把嘢要跟「明哥」學喇！