奧運金牌跳水選手田亮同郭晶晶分手後，今年一月又被逐出國家跳水隊，但佢嘅感情生活依然多姿多采，田亮日前去北京集訓時，被香港傳媒影咗佢喺車廂同小師妹吳敏霞熱吻嘅相。
田亮日前透過香港經理人霍汶希話，佢哋喺車廂冇親吻，田亮聲稱只係食蛋撻。吳敏霞嘅父母日前接受內地傳媒訪問，澄清個女冇同田亮幽會，希望外間可以畀佢個女專心訓練。吳敏霞父母話：「我們剛給女兒打過電話，問過她關於雜誌和網上的傳聞，吳敏霞說沒有這樣的事，那些照片和傳聞都不是真的，吳敏霞希望澄清她和田亮只是以前玩遊戲時打賭，田亮輸了，答應請吃飯，現在只是兌現承諾，他們只是一齊吃飯，談不上幽會。」吳敏霞父母不滿近日被狗仔隊追訪，並說：「這兩天香港狗仔隊追蹤到他們住的小區內，還不斷打電話來，擾亂了我們的生活節奏。」
對於田亮接二連三嘅負面新聞，唔少內地網民紛紛評論，佢哋大部份都狠批田亮，其中網民張震華留言話：「田亮好好工作，不要一天到晚只想着泡妞，沒有緋聞的男人才是好男人，你不煩我都煩。」另外則有人留言話：「田亮？甚麼玩意。垃圾一個。」
Twins噚日喺台北宣傳新國語碟《見習愛神》，兩人近日分別受緋聞困擾，鍾欣桐（阿嬌、左）被問到會唔會送新碟畀緋聞男友方力申，佢就話唔會。而蔡卓妍（阿Sa）被問到有指鄭中基喺手臂紋咗佢個名，阿Sa就話：「我不回答，辛苦工作後還要回應緋聞，很不公平。」被問到選男友條件，阿Sa話：「我喜歡就好。」但提到鄭中基，Twins一齊話：「我們不喜歡他。」
周汶錡噚日到新城接受訪問，佢計劃喺今年出一本旅遊書。
周汶錡近排多咗好多機會周圍飛，而佢又鍾意吃喝玩樂，所以佢想出一本書嚟介紹各地美食。佢話：「𠵱家揀緊幾個地方，應該可以趕得切喺書展前推出，我唔係想轉型做作家，只係想將自己嘅心得話畀大家聽啫。」
由香港電影專業編劇組成嘅香港電影編劇家協會喺上星期五舉行年度春茗，當晚除咗頒發咗一個年度推薦劇本獎畀《旺角黑夜》嘅爾冬陞同《A1-頭條》嘅陳嘉上同鍾繼昌外，重投票選出第八屆執委名單，當中包括有大家熟識嘅林超榮、鍾繼昌、陳慶嘉等，而喺之前十四號舉行嘅執委會議上，就選莊澄做會長、張同祖、文雋、陳嘉上同黎文卓擔任副會長。
亞視前董事總經理黃錫照日前因中風兼併發症病逝，享年七十九歲，佢嘅親友噚日喺寶福山寶勝堂為佢設靈，今日十點舉行大殮，由麥當雄致悼辭，講述佢一生致力電視發展嘅貢獻。噚日未見亞視一班藝員去致祭，但亞視方面話班藝人約埋今日去靈堂致祭，而亞視前老闆邱德根同亞洲電視都有送花牌弔唁。
