有時中資股真係幾難玩，好似月前先至炒得㷫烚烚的大陸地產股，因為阿爺要為房地產市場降溫，推出多項打擊炒風措施，搞到升咗無耐的大陸地產股，例如上海置地（1207）同上海復地（2337）等都倒轉頭勁插。
聽講好多芬佬都係剛剛上車，例如上海復地早前才以每股2.82元批股集資，接咗貨嘅芬佬家陣咁快又要沽貨，都唔知使唔使輸錢？
經紀黃話，呢排工業股仍然係芬佬至愛，例如將在本月30日公布全年業績的信利國際（732），近期股價開始異動，噚日大升10.68％，收11.40元，貼近52周高位。
經紀黃話，江湖傳聞信利即將公布的業績，靚仔得好誇張，若然股價再升，佢亦唔會覺得出奇。
信利主要從事製造手電的彩色液晶體顯示器，同時亦生產有機發光顯示器OLED。去年半年盈利已經高達2.56億元，而截至去年9月底的9個月盈利有3.77億元，所以全年盈利預計好勁抽。
金手指去年入股信利6％，成本價計落每股9元咁高，佢哋咁勇猛，事先必定計過數。
慕容小初