靚女公關A喺農曆新年前就話要同幾位老友食番餐飯，當作「小春茗」，點知約來約去，約到今個星期三，公關A嘆一句：「大家真係咁忙！」好嘞，星期三中午，左丁山到咗銅鑼灣富豪酒店頂樓意大利菜餐廳，咦，乜得番自己一個？人呢？公關A一現身就話電腦J病得好淒涼，重感冒啩，唔嚟得。跟住廣告B電話到，話老細猛咁卒數，臨時要開會傾第二季搶廣告計劃，又唔嚟得。剩番左丁山與靚女A撐枱腳，容易惹人誤會噃。好彩唔使驚，作家C不久之後，施施然駕到，人哋話兩男一女，成個嬲字，我哋就好好傾。
富豪酒店頂樓可以望海望山，左丁山向左望，見到維多利亞公園開緊花展，向右望，見到大球場綠草如茵，等住七人欖球賽開波，視線由右向左，中間有一家中型酒店Rosedale，英文招牌橫跨屋頂，好難話睇唔到。作家C話：「望住個e字下面，有奇景。」睇唔到喎，靚女A提醒：「第一個e字呀！」再睇真吓，e字下面嘅頂樓，有一個男廁，從富豪酒店望過去，睇到三個尿兜；死嘞！」以前馬主N曾在Rosedale頂樓開過黃昏酒會，飲咗兩杯，入過廁所喎，乜原來會畀富豪酒店呢邊睇到晒，該煨咯。」
呢度啲意大利菜幾清淡醒胃，十分健康，成層樓坐滿晒，女士佔咗八成，啲女人消費力真係高。食完飯返到公司，立即打電話向電腦J問候。有無大礙呀？電腦J話：「呢排有兩個夥計辭職，一個又話下個月辭職去旅行，唔做嘢住；一時之間冇法子請到人，自己做到死咗，抵抗力稍弱，立即中招，有時間休息就會冇事，可惜得閒死唔得閒病啫。新春過後，廣告B啲手下搵工跳槽，佢亦做到一頭煙。今年好似好好景，好難請人呀！」