投資銀行家出身嘅TOM集團首席執行官王兟，除咗幫公司買嘢叻之外，自己賣樓都有斬獲。但唔講唔知，其實佢第一次喺香港買樓，係要止蝕離場。
兟哥話，當年屋企人以七千幾蚊一呎，買咗啲尖東寫字樓，但好快就遇上亞洲金融風暴同埋「八萬五」，於是佢即刻當機立斷，以五千幾蚊呎將物業脫手，埋單蝕近三百萬，後嚟尖東一帶寫字樓跌到千幾蚊呎。
兟哥話，Sars嗰陣時，佢認為樓市冇理由再跌，於是喺○三年四月，趁唔出得差又冇咩做，就帶住個口罩，開始四圍睇樓。佢讚香港啲地產經紀係全世界最勤力，就算夜晚十二點都會打電話畀佢……咁成績點？淨係睇佢後來不時左買右賣，得閒賺番一千幾百萬就知。好似佢住開嗰間大潭紅山半島洋房，舊年有好價就賣咗，然後再租番嚟住，你話係咪掂呢。
蘭西早前提到，深井碧堤半島錄得長成交期個案，最近又多一宗，成交期係十個月。
個單位係一期八座中低層E，六百九十呎，作價一百九十八萬，每呎二千八百七十，比市價平幾萬。美記羅志強話，業主買咗二期單位，等緊搬過去住，先至肯畀長成交期，加上入貨價平，平少少賣都有賺。
資料顯示，碧堤對上一宗長成交期個案，都係一期八座E，作價一百九十萬，成交期一年。
兩單都係因買咗二期，至肯以長成交期賣，睇嚟二期可能好過一期喎。
發展商為咗冧啲Fans，紛紛設立會員制，華懋都不甘後人，華懋吳崇武噚日話，公司年初成立華懋會，會員包括業主、租客、商場客戶及公司職員等。華懋連會員親朋戚友都唔放過，務求有咁多吸咁多。
武哥話，希望個會成為公司跟住戶、租客同商戶之間溝通嘅橋樑，而且華懋又有商場、遲啲重有酒店，應該可以提供唔少着數畀會員。
華懋會有啲親善大使造訪各屋苑住客，了解佢哋嘅需要同「踢」佢哋入會。
遲啲，華懋會唔會出動埋老闆娘去做家訪，就未知嘞。
近期二手成交之多，業內人士都話跌眼鏡。不過，銀主盤就逆市減少，上個月只得一百六十九宗，比一月少三成七，重係○二年七月以嚟新低。
利記周滿傑話，由於銀主放盤態度強硬，令吸引力大減，所以影響交投。
二月成交中，最突出係天水圍嘉湖山莊，共九宗，創近四年新高，原因係有投者入貨。其他大屋苑得零星成交，甚至冇交易。
周滿傑話，二手屋苑開始缺盤，估計令購買力轉投售價仍然「低水」嘅銀主盤，刺激銀主成交，相信三月成交可以增半。
荃灣區雖然唔係一線購物區，但零售市道好，因此舖位買賣活躍，最近有個舖位易手，成交價重高過九七年高位㖭。
中原董事黃金鳳表示，大河道榮安大廈地下H1號舖，面積約四百五十呎，剛獲一名從德國回流嘅投資者，斥一千零五十萬元承接，呎價兩萬三，比起九七年高位，重高出接近一成三。呢個舖位喺九七年曾經錄得四度摸售，最後一手造價為九百三十萬。黃金鳳話，呢個投資者諗住買嚟長線收租。
間舖早幾個月至由「巴黎咖啡店」，以每月四萬五千租用，計落回報率得嗰五厘一，而毗鄰嘅H2號舖，舊年易手，買家都有九厘回報。
隔籬嘅G號舖，面積五百二十呎，今年初以一千四百五十萬成交，買家表示，最少要千八萬至肯賣，若果知悉最新呢單交易後，睇怕個價會再提高啲。
電郵地址：[email protected]
