中信泰富前日公布勁賺三十六億，八方噚日寫過佢老闆榮智健拒認係中國首富，其實當日在太古廣場五樓的業績記者會上，重見到榮太子親信范鴻齡（圖），佢好似瘦咗多少，但一樣咁健談。
中信泰富賺大錢，范鴻齡身為董事總經理，酬金一定水漲船高。八方聽聞范總最近捐咗一百萬畀佢母校九龍聖芳濟書院，資助學校重修圖書館，等啲同學仔有更佳嘅學習環境。有個咁疏爽嘅師兄，啲學生仔真有福。
咁點解無端端捐錢？原來今年係聖芳濟五十周年，一班校友發起成立基金，計劃籌集一千萬，幫學校做建設，以及作獎助學金之用，除范鴻齡率先響應，重有四、五位校友已各捐出數十萬，相信好快就達標。
傳真︰2623-9278
電郵︰[email protected]