立法會噚日休會辯論老董辭職後，留番嘅補選蘇州屎點處理。大嚿陳偉業就寸老董，小小腰痛腳痛就唔做特首，踢場波都會腳痛啦！詹培忠話，你問老董點解辭職，同問個人點解自殺差唔多，都係因為有困境、迫不得已啫。林D9就反駁，做特首唔可以同踢波比，老董真係健康問題辭職，重叫大家唔好亂估。
一直喺老董身邊嘅林D9自爆，佢由九九至○二年做特首新聞統籌專員，當時老董每次外訪都精力充沛、健步如飛，答記者問題可以答好長，立法會可以企成兩粒鐘都冇問題，但係最後一次就要食藥同戴腰封先至讀得完。
而到三月十日嘅辭職記者會，佢企咗半粒鐘，一返到後面，就即刻搵梳化坐低成十分鐘先至企起身，可見佢健康幾差咁話。
傳真︰2623-9278
電郵︰[email protected]