瑞典籍球證費斯克一句話受死亡威脅而劈炮唔吹，搞到滿城風雨，而話過費斯克喺歐冠盃十六首回合偏幫主隊巴塞隆拿嘅車路士領隊摩連奴，重成為眾矢之的。呢單嘢究竟誰是誰非，一下子好難有答案，但可以肯定嘅係，球證真係會秤先主隊啲。
英國薩里大學嘅經濟策略研究中心最近做咗項球證執法研究，顯示如果主隊係領先客隊一球嘅話，球證會補少啲時間；相反，若然主隊係落後一球，就會補長啲，平均補多成三十五秒，等主隊有更多機會追成平手或者反超前。呢個報告重話，球證秤先主隊，好大程度係受到主場球迷嘅壓力。
當然，這唔可以一概而論，好似英格蘭球證普爾咁，今屆佢吹咗三十六場比賽，主隊只係贏咗十七次，贏波率唔夠一半；但係，有啲球證的確「旺」某啲球隊，例如德國球證梅克就特別旺拜仁慕尼黑，拜仁今屆有兩場主場聯賽由佢吹，全部贏晒。
球迷下次買波時，唔淨止要睇球隊嘅對賽往績、陣容同埋近況，睇嚟重要留意埋由邊個球證吹至得嘞。
皇馬最近喺歐冠盃出局又喺西甲輸畀升班馬基達菲，但居然重放碧咸同朗拿度去做宣傳，我求大俠初時以為教練盧森貝高咁順攤冇罰球員加操，原來冇咁嘅事。西班牙啲報紙話盧森貝高喺周二嘅練習，要班球員跑五公里，有咁上下年紀嘅施丹同卡路士跑完之後面都青埋。教練話班球員喺場上跑動太少，想操弗佢哋啲體能，睇嚟佢哋有排捱。
皮亞斯𠵱家頂咗基瑾個位做英超曼城嘅臨時領隊，聽講佢好想坐正咁話；而我求大俠就收到風，曼城班高層話喺餘下九輪聯賽，只要皮亞斯幫球隊贏到五場，就可由「替工」轉到「長工」。雖則曼城嚟緊嘅賽事唔算難打，多數係對啲中下游球隊，之但係，佢哋喺今屆英超勝出率得三成一，所以對於皮亞斯嚟講，幾乎係「不可能的任務」。
國足月尾到歐洲友賽對手嘅愛爾蘭就公布咗最新大軍入選名單，大部份主力球員好似車路士嘅杜夫、熱刺嘅羅比堅尼同曼聯嘅奧舒亞等，而隊長堅尼亦獲重加入大軍之中。不過，愛爾蘭會先喺世盃外圍賽對以色列，三日後才對中國，我求大俠就擔心，𠵱家愛爾蘭公布人腳咁強對國足當然係好事，但踢完外圍賽後，究竟有幾多個會因傷退隊？
逢周一至周五見報