堪富利搭褒曼太完美
美琪、比利情侶檔最得民心

大型零售集團Woolworths最近訪問咗超過三千人，選出佢哋心目中最佳嘅電影情侶，結果喺八九年經典愛情電影《90男歡女愛》入面扮演情侶嘅美琪賴恩（MegRyan）同比利基斯度（BillyCrystal），榮登今次選舉嘅榜首，其實舊年倫敦一間大學嘅學者透過科學研究，已經揀出美琪同比利係最有化學作用嘅銀幕情侶，如今佢兩個再次成為冠軍，可謂實至名歸。

女高男矮唔登對
《90男歡女愛》故事講美琪同比利原本係好朋友，不過後來發現愛上對方，而戲入面最令觀眾難忘嘅場面，莫過於美琪喺紐約一間餐廳入面扮性高潮嘅情節。
而屈居《90男歡女愛》之後，係四二年電影《北非諜影》入面嘅堪富利保加（HumphreyBogart）同英格烈褒曼（IngridBergman），相信好多觀眾都重記得佢兩個情意綿綿嘅演出，不過大家就未必知，現實中英格烈高過堪富利，所以堪富利拍戲嗰陣要着對厚底鞋先夠高。

經典舊片受歡迎
另外，九○年電影《風月俏佳人》入面嘅李察基爾（RichardGere）同茱莉亞羅拔絲（JuliaRoberts）今次亦有入選。Woolworths發言人表示今次入圍嘅作品，通常都係一啲經典舊片，證明咗佢哋嘅受歡迎程度係歷久不衰，經得起時間考驗。