趁拍劇空檔剪綵搵真銀
黎姿賺到笑搬四千呎大屋

穿上露背裙的黎姿昨日佩戴三百六十萬珠寶往又一城，為護膚化妝品牌新店剪綵。黎姿昨日趁拍劇午飯時間出席活動搵真銀，早前換了新車的她透露今年大豐收，希望搬大屋，正物色四千呎新居。

黎姿昨日穿上Anteprima露背裙，佩戴價值達三百六十萬的VanCleef&Arpels珠寶往又一城，出席EsteeLauder新店開幕禮，連助手及保安，共有十人為黎姿護駕，難怪她指感覺有如台慶夜。名模周汶錡、樂基兒、Rosemary和羅霖等，都有出席活動。

頻撲自比灰姑娘
黎姿真空上陣，問她怕不怕走光？她說：「呢條裙點都冇得戴bra㗎啦，我唔介意大大方方咁性感。」她笑言昨日賺取六位數字酬勞，感覺像灰姑娘極速變身，她說：「我呢排趕拍緊《胭脂水粉》，噚日拍到零二，返屋企瞓幾個鐘零五再拍過，今日（昨日）嚟呢個function都係抽半個鐘食飯時間，化妝換衫都喺車內，只係食咗個漢堡包當午餐，着到咁靚為咗呢半個鐘，跟住又要換番套運動裝入廠再拍過，你話似唔似灰姑娘吖？」

「接咗好多工作」
黎姿又賣口乖多謝《胭》劇監製梅小青，她說：「拍呢套劇期間，監製幾次都放我出去搵真銀，同埋公司幫我接咗好多工作，同時又出面幫我推咗啲唔適合我嘅工作，如果冇
TVB咁大間公司做後台，我自己都唔知點推。」黎姿直認今年大豐收，早前已換新車，稍後希望搬新屋，問她希望物色多大的新居？她說：「我𠵱家住緊間屋二千呎，希望搬間四千呎嘅大屋啦。」
採訪：林妙萍　攝影：陳志嵐