上兩個禮拜，有利時睇場之稱的水貨大亨「袁仁祥」，親身到紅磡差館里的觀音廟排隊借庫，身披最新BathingApe藍迷彩Zip-up衞衣，炒價高達$8,000。完成儀式後，祥哥的衞衣外套已沾上一陣濃濃煙火味，袖口還被香燭燒穿，猿迷睇見都心痛。祥哥今次認真去拜神，只因與他之前睇錯巿、押錯碼有關。
據水貨圈中人透露：「祥哥雖然靠走水貨Ape起家，但近幾年卻不斷唱淡。早幾個禮拜日本推出新猿顏迷彩Zip-up衞衣，質地夠厚，屬靚貨。佢卻唱反調話香港3月潮濕悶焗，批衫唔夠薄，香港冇人會買。點知今年天氣反常，香港3月仍只得十零度，加上明星效應，SillyThing旗下班星勁着呢批衞衣，充當人肉廣告牌。唔使兩日批衫就被炒到每件8、9千，祥哥回心轉意想追貨，但已屬摸頂價，邊有水位佢賺？先達陳果同其他水貨商可能預早收到風，一早搵排隊黨擸重貨，藉呢批衫喺猴年開個紅盤。」
原來祥哥近來將啲錢壓咗落其他牌子度，通常係啲唔使排隊，易買到嘅貨，例如Neighborhood。可惜呢個牌子近年唔見有起色，炒唔起亦冇乜人着，害祥哥積壓唔少死貨。加上近來日圓滙價飆升，令祥哥財壓大增。難怪祥哥今年咁認真求神庇佑，希望度過難關。
主持人：大食Jack
八卦熱報：[email protected]