45條關注組四位成員梁家傑、湯家驊、吳靄儀同余若薇全部都係大律師，要佢哋接受新嘅特首任期唔係五年真係好困難，除非修改《基本法》啦，因為《基本法》係咁寫，有法不依，你叫佢哋點頂。
當然中央唔會考慮修法，因為呢個一講就要等一年，《基本法》規定修改《基本法》嘅權力在全國人民代表大會。湯大狀已經講得好白，修改行政長官選舉條例冇用，因為經唔起考驗，但係你叫班大狀好似泛聯盟咁公然叫釋法實在好難。梁家傑就話，今次老董落台對佢嚟講「何喜之有」，因為佢從來冇叫過老董下台，對佢嚟講，就算特首有三頭六臂都冇用，事關問題係個制度，而唔係個人能力問題咁簡單，制度一日不變都冇用。
李柱銘都係大狀，佢就怕自此之後，香港唔係變成一國一制，而係一國冇制。
傳真︰2623-9278
電郵︰[email protected]