有線電視重鎚出擊投資電影，馮仁昭八到佢哋下半年即將開拍古裝大製作《曹操》，投資金額預計係千五萬美金（約一億一千六百萬港元），幕後班底已經定咗，全部都係國際級人馬，由攞過奧斯卡最佳攝影嘅鮑德熹做攝影、奚仲文做美術指導、洪金寶做武術指導；至於導演，就由十年冇拍戲嘅有線電視執行董事徐小明重出江湖親自執導。
據知呢套《曹操》除咗有大場面嘅戰爭鏡頭外，噱頭係會披露曹操鮮為人知嘅感情生活。至於男主角人選，屬意梁朝偉、金城武同埋劉德華呢三位入面揀一個；女主角人選未定，分分鐘會由新人上陣都唔定。
除咗曹操同女主角外，片中重有一個重要角色，係同曹操過招嘅周瑜，周瑜呢個角色，原本諗住搵白淨斯文靚仔，但佢哋有個新構思，就係想搵楊紫瓊反串，據講楊紫瓊已經睇緊劇本，不過重未有正式答覆。
榮升媽咪嘅李綺虹將會擔任今晚播映嘅《纖姿綽約身形象5》嘉賓，佢話用咗十一個禮拜，就由一百四十磅減到一百零七磅，腰圍由三十四吋減到二十五吋。李綺虹又話早排拍咗個纖體廣告，重以性感孔雀造型亮相，咁啱拍攝當日係李綺虹生日，纖體公司就送上蛋糕同佢慶祝。
組合2R噚日接受新城電台訪問，佢哋話對月底推出嘅唱片好有信心。對於有指鄭融因為講粗口同食煙而俾公司雪藏，2R話：「我哋冇見過喎，之前都話我哋俾公司雪藏啦！咪又係咁多嘢做。」
澳洲傳奇組合BeeGees嘅靈魂人物RobinGibb，將會喺今年六月十一號喺香港舉行個唱「RobinGibbofBeeGees'MagneticTour」，佢重以香港作為亞洲巡迴嘅第一站，原來因為Robin嘅太太係華人，佢想到時同老婆睇吓九七之後嘅香港。聽聞Robin今次嚟香港演出嘅酬金有成一百萬美元（約七百八十萬港元），都算係一項紀錄。
陳寶珠噚日去城市理工大學出席「城大和春天有個約會」，寶珠姐更代表春天舞台捐贈一百萬港元畀城大做獎學金，筆善款由一位香港商人以春天舞台名義捐出，但寶珠姐話唔認識呢名善心人。
