【本報訊】從兩年前沙士疫潮慢慢復甦的淘大花園，差餉租值平均上升一成二（每月十九元），晉身差餉升幅十大大型屋苑的第三位。
淘大業主委員會主席葉興國認為，加幅勉強可以接受，但對E座業主而言仍屬偏高，因其租值與樓價相對同區、同邨其他樓宇仍然偏低，樓價只上升一成五至兩成，「佢哋（E座居民）重係受緊沙士後遺症影響，啲人有錢有樓揀都唔會揀E座啦！」
淘大花園在沙士疫潮爆發後整體租金下跌，○四年重估租值後，整體差餉減少三成，其中疫情最嚴重的E座更減少四成。
由於地產巿道轉好加上屋苑各項推廣措施，租值去年略為回升。
淘大E座居民曾太則指經濟復甦是假象，單位升值不多，增加差餉對居民而言是百上加斤，「啲地產代理貼出嚟話值八、九十萬，到成交又未必係嗰回事，聽高層啲街坊講，成交價重係好低，不過啲人唔想留喺度，平都會賣囉。」