謠言滿天飛，都唔知信得邊樣，譬如話，有冇人出馬同曾蔭權競選做「新的特首」呢？暫時冇。消息人士話李鵬飛眼中之曾蔭權對手──唐李梁──三人，其實梁振英、李國章都講咗唔會參選，更話此兩人到咗○七年都唔會參選。曾蔭權目前只有一個對手，就係唐司長，唐司長肯定唔順超㗎嘞，董世叔突然請辭，連世姪都蒙在鼓裏，當然氣到面紅耳熱啦。但更激氣嘅事情還在後頭，因為盛傳早已投入佢嘅陣營嘅重要顧問，可能已經返回曾蔭權身邊喎。試問冇咗熟悉公務員運作嘅「橋王」，唐司長臨急臨忙去邊度搵人替補？
玩政治，曾司長久歷戰陣，跟過彭定康大戰中方，自然累積咗豐富經驗，勝過紅酒專家好多，阿爺睇中佢，理由不難理解。但係阿爺畀佢唔少難題，其一就係只做兩年，以考驗其忠誠；第二就係要佢留下所有司長、局長、行政會議成員，以示團結。代表本地傳統愛國派利益嘅梁振英、鄭耀棠、曾鈺成以及董生擁躉廖長城都唔肯及時回港參加行政會議，已係一種訊號，試問新班子未開波，已現裂痕，將來開會，能有多少共識？再加上一位想做特首嘅司長，何來真正團結穩定，和衷共濟！
梁振英在新城電台講貝里雅與白高敦嘅例子，已經講到非常明白。貝里雅與財相白高敦本有共識，做兩屆工黨首相就會讓畀白高敦，但染上權力癮，邊度肯自動放棄㗎，故此白高敦與貝里雅嘅明爭暗鬥，已經不是英國國家機密。英國嘅民主政治成熟，可承受執政黨兩位大人物權爭嘅後果，香港初初起步，情況唔同喎，中央應該批准唐司長離開，在外與曾特首爭持，好過要留番唐司長在「內閣」，表面歡笑，暗裏互顯神通也。