甲級商廈市道熾熱，造價屢創新高，中區指標皇后大道中九號，八樓全層一萬三千七百呎，日前以一億五千萬售出，呎價萬一，係該廈金融風暴後新高，夠晒矚目。
中記李百堅話，原來當日皇九有兩宗成交，另一宗係三十樓四至五A室，六千八百呎，呎價高見一萬一千三百蚊，重比八樓高少少。睇怕，呢幢中區商廈之王，今後呎價冇一萬以上，業主都唔肯割愛。
賣方係澳門投資者，舊年十月，以呎價九千五買入，𠵱家摸出，賺一千二百幾萬，呢項投資，唔夠半年，升值近兩成。
佢話，皇九𠵱家只得三個零散單位放盤，都係千二同三千零呎，叫價每呎萬二以上。
復活節就快到，商場又要搞活動，信和十個商場，會用五百萬裝飾宣傳，主打大角嘴奧海城商場與屯門市廣場。
信和蘇蔡潔蓮話，佢哋重搞「自助購物遊」，與內地旅行社合作，安排內地客嚟購物消費，當然有優惠啦！第一團前日到，初期集中廣東。為咗迎合佢哋，商場除吸納周大福，重會搵內地客鍾意嘅化妝品牌進駐。
信和林寵陞話，佢哋商場今年續約加租幅度，同大市一樣，約一成至一成半。另外放棄做「運動基地」嘅奧海城一期商場，出租率逾六成。
另外，長實及置富產業信託嘅商場，復活節以韓風做主題，辦韓星模仿大賽、韓國御膳美食宴及宮廷舞蹈巡禮。
至於九龍倉尖沙嘴海港城，以八呎高十呎闊嘅巨型復活蛋做招徠，本周末至三月二十八號，只要捐款畀香港血癌基金，小朋友可以喺巨蛋上畫圖案。
屋之島噚日搞記招，除咗請記者外，重請咗啲中區公司嘅外籍客出席，會上講吓對今年商廈同豪宅市道睇法。會後再設美酒招待。屋仔總共攞咗六支酒畀大家試飲，其中一支係1961年嘅ChateauDeLaTeyssonniere，係一個冷門嘅酒莊出品。
聽屋之島董事李思博講，呢支紅酒，係前老闆孫漢明早兩年喺瑞士買嘅，千零蚊一支。李董話，重好過同年份嘅Lafite喎。唔知屋仔同事同啲嘉賓，摸完酒杯底，有冇促成到交易呢？
財政預算案今日公布，美記認為，樓市全面復甦，政府毋須再推太多措施，樓市都會保持穩定。而且，因樓價上升，政府印花稅收入相信會大增。
美記建議政府，減低一百萬至一百五十萬細價物業印花稅，由零點七五巴仙，減至一百蚊，推動上車盤成交。
儘管減收細價樓印花稅，但樓市買賣暢旺，相信只會輕微減少稅收，來年印花稅，估計仍達七十三億。
利記何紹章認為，政府既然鼓勵生育，應增加供養子女免稅額，咁至有助減輕市民負擔。
香港仔黃竹坑香葉道二號英美煙草大廈，舊年底得到城規批准起酒店，業主趁𠵱家成日都話唔夠酒店房間，咪攞塊地出嚟招標，諗住可以賣到好價錢。
雖然話起三四星酒店好有可為，但呢塊地原來未同政府補地價，買家重要過地政處嗰關。上個月拍賣嗰幅，可以起酒店嘅九龍灣商貿地，成交樓面呎價搶高到三千，咁政府補價又點會平吖？
呢塊地成四萬九千呎，可建一幢三十八層高酒店，總樓面七十三萬五千呎，提供近千五間房。五月五日截標。
電郵地址：[email protected]
