個市唔多掂，人心怯，恒指跌90點。滙控（005）今日除2.1元與新地（016）除0.70元股息，相等於恒指80點。昨日期指低水146點，計埋滙控、新地除息因素，即係實際低水66點。
恒指P輪：昨日成交大而升得勁嘅恒指P輪，係4516，收6.8仙，升幅36%，龍虎榜上排第4，成交金額有56球。隻輪溢價1.1%，槓桿率40.6倍（有效29.3倍），引伸波幅15.7%。用恒指計數，有1.1%溢價。用期指計數，則差不多平水。未來仍會波動，期指升跌140點計，隻輪輕易有35%升跌，上落會非常刺激。要留意嘅係，隻輪已進入末日階段，屆滿日係本月30日，而最後交易日則係下周二，即係剩番5個交易日買賣。
唔想咁刺激同埋受到時間嘅壓力，恒指P輪3748比較啱玩，7月尾到期，輪價20.6仙，溢價3%，槓桿率9.9倍（有效7.3倍），引伸波幅19.5%。
恒指C輪：滙控與新地今日除息，如果實際冇升冇跌，恒指將係13736。大市氣氛淡淡哋，如果恒指再落，例如落到去挨近13500嗰頭，博反彈，揀恒指C輪短炒，正路之選係3775，7月尾到期，輪價15.1仙，溢價1.9%，槓桿率20.3倍（有效11.9倍），引伸波幅17%。想搏殺啲，則揀3838，亦係7月尾到期，輪價9仙，溢價3.8%，槓桿率40.4倍（有效16.3倍），引伸波幅15.1%。
長實C輪：長實（001）收70.25元，跌0.50元，若確實70元大關守得住，博反彈，買C輪，揀3560，昨收16仙跌16%，成交金額29球，贏輸計數易。
章盛