煲呔忽然接棒睇住個特區政府，行會班同事當然各諗各路，話就話叫人人留低，但係佢老哥喺七月選舉後一旦坐正，形勢就可能好唔同。
於是好多人就開始估邊個會劈炮先？太子章一向惹火，所以最早有消息話佢唔撈，八方即時周街求證，聽到嘅版本係空穴來風，未必冇因，好似話太子章怕同煲呔嘅教育理念唔同，所以先禮後兵喎。不過，呢個講法受到好多人挑戰，話好似冇聽過煲呔有乜嘢教育理念。話雖如此，太子章都係醒目之人，呢一百二十日點都要畀面阿爺，大局為重，之後就再從長計議啦。
又八方早前寫過大班唔會做煲呔副手，睇嚟都好啱，因為上個星期四，佢一方面叫范太畀佢休會辯論老董辭職，跟住又自己叫點人數，最後流會，范太都未rule就收工，有人笑大班自毀長城，都唔係冇道理。
傳真︰2623-9278
電郵︰[email protected]