特首任期二五之爭，由北京當局操控，再次造成大分化、大撕裂、當撈曾被迫上火線，直接受埋靶！
未做特首嗰陣時，曾爵士俾人叫「當奴曾」，之不過現時唔同嘞，「港英餘孽」身份做埋特首，重「奴」咩呀？應該改名叫「當撈曾」！壽爺明明握手揸足六秒鐘，應該信到十足，畀當撈曾玩足五年，先至係正路，不過可惜因為一啲不明嘅黑箱原因，由江太祖頭馬唐家璇搶先發言，定案係兩年，咁就整定特區兩年會多事！
董班子餘孽之一嘅律政司司長梁愛詩，終於「認錯」，話特區政府當初以為五年，係表錯情，經佢親自飛北京睇咗啲「文件」，先至了解到當初基本法「原意」，特首半途離任，繼續嗰個，查實係要「食剩餸」，而唔係另開一枱！
詩姑上京，啲八叔畀咗啲咩嘢佢睇，搞到佢面青青咁落返嚟就大轉軚呢？真係一叠「草委」會議紀錄嘅真實文件，定係一把半拔出鞘嘅鋼刀呢？呢一樣佢就冇講明嘞！不過，若然啲「草委」當年有講過呢一樣，咁就要公布當日條文草稿點樣刪改，證明兩年定五年，當日有傾過，為防止有人事後造假──呢樣嘢喺大陸一啲都唔出奇──重要公布埋當日啲草委傾呢一個point嗰陣時嘅對話錄音！
若然有齊證據，咁特區就冇得司法覆核，中方亦毋須又「釋法」，若然交唔出，咁若然有啲好似盧少蘭咁嘅香港良好市民，追求獨立思考，同埋出於好奇心，搵法院打爛沙盤問到篤，咁就好難怪咯，因為香港始終係要講法治嘅係咪！
而當撈曾係咪可以變為「㩒撈曾」，跟住玩足十二年，聽講中方有人亦想借呢單嘢考考佢牌（希望呢個人唔係握手六秒鐘嘅壽爺喇）！對於當撈嚟講，最好就少出兩句聲，推晒畀詩姑去講、去做，橫掂佢由唔告胡仙事件開始，塊面經已花晒，有乜污糟嘢，唔怕由佢孭多一單，做埋法治千古罪人再退休，至多事後為表撫恤，過幾年再由當撈頒個大紫荊勳章畀佢吖？
傳真︰2623-9278
電郵︰[email protected]