皇家馬德里啱啱喺西甲聯輸畀升班馬基達菲，照佢哋教練盧森貝高一貫作風，應會罰班球員加操；點知唔單止冇咁做，重放碧咸返英國倫敦出席佢間足球學校嘅記招，又畀朗拿度去德國漢諾威幫一間手電公司做宣傳，真係令人費解。
碧咸個活動有啲慈善性質（頭萬五個入讀嘅細路費用全免），皇馬為建立公眾形象，放人都無可厚非；但就冇理由畀啱啱搞咗支車隊嘅朗拿度出席商業活動。之但係，嗰間手機公司唔淨止係朗拿度嘅私人贊助商，同時亦有喺皇馬件波衫上賣廣告，即係皇馬嘅官方贊助商；而聽講皇馬同呢間德國公司份約值成一千二百萬歐元，試問重係周身債嘅皇馬，又點敢得罪自己嘅米飯班主呀！
皇馬𠵱家喺西甲聯落後榜首巴塞隆拿成十一分，比第三位嘅維拉利爾又多七分，雖則無乜機會爭標，但亞軍應該穩陣。而喺往後嘅日子，皇馬或者會繼續叫班球星出去搵銀，所以真係小心佢哋啲戰意，千祈咪盲目捧場。
巴西波球證演《功夫》
周日巴西由阿美利加對明尼路嘅地區賽事上演一幕「全武鬥」，屬於落後一方嘅明尼路球迷因不滿球證施華執法，中途衝入球場起飛腳踢去球證度；球證亦出腳還擊，上演球場版《功夫》。腿來腳往成兩分鐘，場邊保安先拉走個球迷。事後個球證重話唔後悔，因為有老婆仔女要養，唔可以受傷。咁又係，當時冇保安幫手，唔通企響度俾佢打咩！
祖國「籃彩」難風行
祖國繼足彩後，嚟緊周五會推出籃彩，不過玩法好騎呢，估嘅係主隊、客隊上半場及全場得分嘅個位數，共四個數字。不設安慰獎，最高派九千八百蚊人民幣；第一場要估嘅係魔術作客超音速。假設上半場魔術領先五十一比四十、全場贏九十九比八十三；咁中獎號碼就係一、○、九、三，只係靠撞，又冇技術、獎金又唔高，幾難受歡迎喇！
德國佬入侵英倫？
溫布萊球場喺明年落成啟用，有關方面諗住透過網上投票嚟幫通往球場條橋改名，但點知好多德國佬登記，重認為改做「迪馬夏文橋」最啱。夏文呢個德國國腳係最後一個喺溫布萊入波嘅人，用佢個名嚟做條橋個名，都算合理；但弊在英格蘭同德國係球壇宿敵，而且英國佬向來認為佢哋係足球發源地，點會肯畀自己個靚場有個外國佬名呀！