幾乎每逢特首跑馬仔競猜遊戲都會慘遭點名話佢好想做特首嘅馮國經，見到老友董建華落得如此下場，馮國經應該為自己無趟渾水抹一額汗。佢噚日話，雖然大家對老董治港理念同政策會有唔同睇法，但喺佢眼中，老董係個事事以香港利益為大前提，一切以香港利益為出發點，永遠以忘我精神為香港、為國家出力嘅人，令佢十分敬佩咁話。
馮國經又話，同署理特首煲呔認識已久，自佢擔任大珠三角商務委員會主席後，兩人有更多接觸，馮國經大讚煲呔極具視野，甚有魄力，加上做官三十幾年，肯定佢能勝任。
除咗馮國經主動挺曾之外，另一位下屆特首黑馬吳光正，噚日亦特別以「把握復甦機遇，蓄勢待發」為題，公布旗下九龍倉舊年嘅業績。九倉舊年業績固之然好，賺三十七億幾。最特別嘅係，吳光正喺新聞稿度話：「隨着通縮期喺舊年七月結束，香港又再回復我們熟悉嘅舊貌……」八方心諗，如果將前句換成「隨着老董七年半施政結束」，會唔會更加貼題呢？
傳真︰2623-9278
電郵︰[email protected]