煲呔新上場，上周六四個行會成員包括曾鈺成、鄭耀棠、梁振英同廖長城都唔畀面出席特別行會，搞到個會變得好冷清，有四張空櫈。到噚日，曾鈺成都係唔見影，煲呔就話佢家有喜事所以嚟唔到，叫啲議員咪亂估。
八方聽聞曾鈺成噚日嫁女，但係好低調，連煲呔、蔡素玉同陳婉嫻都冇請，老董就唔知有冇收帖。
曾鈺成成日話同老董做嘢有辱冇榮，咁今次老董冇得撈，佢應該最高興先啱，更何況，喺佢舊年十二月底接受訪問時，第一個響起八百人選委會到今年中就會屆滿嘅警號，重話自己唔係講黑心話，如果特首喺冇咗選委會嘅時候出缺，香港會出現憲制危機。結果北京及時喺選委會解散前郁咗老董，𠵱家曾鈺成又批評中央太過機關算盡，因為香港人好識鑽法律空子，分分鐘趕唔切喺六個月選出特首，喂！神又係你，鬼又係你，真係冇人知成哥想點？
傳真︰2623-9278
電郵︰[email protected]