王菲同李亞鵬嘅婚事進行得如火如荼，內地更有報道話李亞鵬舊愛周迅同男友李大齊已經秘密結婚，周迅曾經講過同李亞鵬分手後，自己感情大受傷害，重自閉咗兩年，但當同李大齊拍拖後，周迅再次得到愛情滋潤，佢重曾經當住好多人面前講過：「李大齊是我一生的選擇。」周迅呢次搶閘結婚，馮仁昭不期然喺度諗佢係咪想向李亞鵬示威呢？
另一方面，有傳會同李亞鵬下個月喺北京搞婚禮嘅王菲，日前喺香港見傳媒時，一直笑笑口避談婚事，咁啱近日有內地報道爆料話，王菲呢次結婚係被迫嘅。
內地報道表示王菲嘅朋友話王菲真係有諗過休息唔唱歌，但係就重未有結婚計劃，所以王菲呢位朋友就好質疑王菲同李亞鵬嘅婚事，估計係李亞鵬同胞兄李亞偉自導自演嘅一齣戲，因為佢哋將婚訊傳咗出嚟，王菲就會心軟應承。王菲嘅友人好戥佢唔抵，重猛話李亞鵬李亞偉兩兄弟成日扯貓尾放消息，佢哋根本喺度做戲喎。
最近因為拍攝亞視劇集《美麗傳說2》而返港嘅萬梓良，前晚接受港台節目訪問，佢除咗提番早年同周星馳拍《他來自江湖》不和嘅傳聞係假嘅之外，又大講主持李力持同周星馳嘅關係，佢話：「聽到你同阿星咁唔開心，搞到我都好唔開心，世界係圓嘅，喺某階段合作梗係有拗撬，下次再碰頭應該擺出乜嘢模式，就要睇吓你哋智慧有幾高。」
劉香萍個女貝安琪噚日係尖沙嘴為一間鞋店做表演嘉賓行catwalk，媽咪劉香萍都有捧場，劉香萍話囡囡今年工作排到年尾，同上年嘅情況完全唔同，佢話：「比起舊年，今年嘅工作多好多，可能舊年犯太歲，無幫佢攝。」
元華噚日到新城接受訪問，佢近日正喺度趕拍由王晶做導演嘅《雀聖》，佢坦言呢套新片因為冇完整劇本，所以都幾擔心自己消化唔到啲情節，元華話：「自己都覺得辛苦，亦都有向監製反映，但佢都只係歎氣一聲做回應咋。」元華都喺影壇打滾咗幾十年，冇完整劇本又點會難到佢呢？
周國賢噚日喺商台出席記者會，現場有幾十個fans守候，其中重有一個fans送咗佢一個粉紅色鬚刨做禮物，認真抵死。周國賢將會喺下個月十二號喺九龍灣國際展貿中心舉行個人音樂會，佢話自己𠵱家嘅心情十分緊張，重打算搵梁詠琪做佢嘅演唱會嘉賓㖭。
鄧穎芝噚日以嘉賓身份，出席太古城戲院試玩極具人氣嘅電視遊戲，佢表示喺戲院打遊戲機嘅感覺好新鮮，最適合玩一啲詭異氣氛嘅遊戲，夠晒剌激，不過佢話喺戲院打機要二千八百蚊兩個鐘就貴咗啲，起碼唔可以廢寢忘餐咁盡情去打。
