祖國真係「偉大」，胡溫曾運用權術，不費吹灰之力喺兩個星期內換咗個特首，港人冇上街，股市樓市冇反應，國際社會亦冇聲出，當然，共產黨整件事都計算得好精確，裏應外合，不容有失。
老董自稱喺舊年第三季開始覺得健康「大不如前」，考慮過向中方請辭，但係冇行動喎，直至二月底兩會開會前，先至忽然傳出佢會做番全國政協同升上副主席，當時香港人先如夢初醒。
如果冇記錯，傳媒係喺上月二十六號收到老董會升上神枱嘅消息，二十七日政協常委黃光漢證實，名單上的確有老董大名。之後嘅一兩日，八方同啲同事就從四方八面收到老董好快唔撈嘅消息，通風報信嘅人言之鑿鑿，話係北京勁料，加上特首辦罕有唔否認，一場老董下台記嘅序幕隨之揭起。
老董亦好口密，到「適當時間」，即係喺三月八日國務院港澳辦轉俾佢有關佢獲提名為全國政協副主席人選後（見老董辭職報告），佢先肯揮筆寫其辭職信。
老董今次咁順攤，一定同中方枱底政治交易。聽講佢老人家放下重擔後表現好釋然，十足虛雲老和尚咁嘅容顏，睇嚟老董亦看透了。
傳真︰2623-9278
電郵︰[email protected]