曾蔭權做特首，報紙大量報道佢嘅家庭背景。曾蔭權嘅成功要素究竟係乜嘢？曾先生自己對報紙話過，做ＡＯ最緊要聽上頭差遣，調你去邊就去邊，千祈唔好話唔去。抗命唔去有兩個壞處，一係表示自己唔掂，冇能力接受新職；二係要揀擇，只做自己喜歡嘅職務。對上頭嚟講，咁樣即係冇人肯去守邊境，冇人肯去清潔掃街啦，上頭重有乜指揮能力？
曾蔭權醒目在聽話，既聽話又有辦事能力，就容易升官。現在滙豐亞太區行政總裁邵銘高只有四十幾歲，過往咁多年，滙豐叫佢去邊度就邊度，歷盡艱辛。滙豐啲行政人員，冇一個敢違抗調派令，阿支阿左嘅。總之年輕時代，一於忍忍忍，深藏不露，埋頭辦事，喺中國人社會，定有好處。
一位對台灣好有認識嘅上一代朋友，算係左丁山前輩，說過一個故事。今日令大陸好頭痛，甚至憤怒嘅李登輝中年做官時，好識得忍功，並且識得押寶。老總統蔣介石還在時，蔣經國做行政院院長，李登輝喺官邸不顯眼處，擺放蔣經國嘅靚相，而當時啲大官，一定掛老總統張相嘅。呢件小事，自然傳入蔣經國耳朵之中，加上李登輝每見蔣經國，必恭必敬，小蔣談話，李登輝逐字抄落筆記簿，甚得小蔣鍾意。碰啱同是本省（台灣）大官嘅林洋港鋒芒畢露，老蔣忌之，小蔣唔放心，李登輝於是得其所哉，成為國民黨傳人。登其大寶之後，露出真面目（台獨、破壞國民黨），國民黨已經冇人可以制衡佢。
中國官場文化，數千年不變，由曹丕、楊廣到今天都是如此，總之身為下屬嘅勿招皇帝、大老闆之忌，無災無難到公卿。多多聲氣，驚叻唔切嘅，因住似楊修咁樣收場。