美國《InTouch》雜誌最近搞咗個最佳名人美腿選舉，同類型選舉中嘅稀客、美國女歌手GwenStefani，今次竟然獲選第一位，而經常俾人笑擁有一雙象腿嘅BritneySpears以至六十五歲嘅老牌黑人歌手TinaTurner都打入十大，令唔少人跌爛眼鏡。
《InTouch》雜誌早前透過讀者投票，選出擁有最靚長腿嘅十大名人。唔知班美國讀者係咪俾人魚目混珠嘅關係，呢排經常着超高踭鞋現身、身高五呎六吋嘅GwenStefani居然被選為第一，而排第二至四嘅名人，順序係奧瑪花曼（UmaThurman）、籮霸珍妮花洛庇絲（JenniferLopez）同埋金美侖戴雅絲（CameronDiaz），真係輸得唔抵。
不過，排名第五嘅名人竟然係BlackEyedPeas嘅主音，即係有啲babyfat嘅Fergie，緊接其後嘅係六十五歲嘅黑人女歌手TinaTurner，估唔到佢喺大眾心目中都唔輸蝕畀班後生女。但最奇嘅就係經常俾人笑象腿兼成腳「蚊癱」嘅BritneySpears都可以打入第七位，認真神奇。
至於排名第八嘅係過氣網球手古妮高娃（AnnaKournikova）；啱啱憑《擊情》第二次奪得金像影后嘅希拉莉史雲克（HilarySwank）今次亦排名第九，而最鍾意着高衩裙露腿嘅伊莉莎伯凱莉（ElizabethHurley）亦掹車邊打入第十位。