老董上神枱，煲呔臨危受命，雖然係署理性質，但係都要落力做場好戲畀港人同北京睇。八方聽聞，由上星期六開始，政府總部就好似打到嚟一樣，乜都要快快快，老董以前慢三拍，𠵱家就肯定快幾拍。
香港人一向講效率，老董又的確慢得可怕。煲呔𠵱家一人做兩個位，又係特首，又係政務司司長，正式聲音兩邊走，不過，佢個新聞秘書陳羿話，煲呔平日都會喺西翼辦公，有需要先去特首辦。
根據法例規定，公職人員如煲呔，如果要參選特首，就要先辭去官職，所以特首提名之日，就係煲呔辭職之時。八方問班公僕，對於新官上任有乜感想？佢哋笑話，換個大老細啫，公務員都一樣係咁做嘢㗎啦，最緊要知道邊個係新老細。咁又係，北京今次咁快手，好似斬雞頭咁手起刀落，隻雞腳重撐撐吓，唔知自己經已準備好投胎。
至於煲呔十二號發出封叫公務員「同心協力」嘅信就人人都收到，認真神速，大家見到煲呔個簽名（圖）都知冇乜安樂日子過。
傳真︰2623-9278
電郵︰[email protected]