昨日睇譚紹興嘅「投資學堂」，條題起得相當過癮──「港股本周煲呔鬥秋官」。秋官新劇叫「御用閒人」，而煲呔已貴為御用紅人，紅人贏閒人理所當然，所以港股昨日先跌後升，恒指升15點，收13906。
港股的昇平效應頗明顯，13800水平買盤強勁，似是短期底線，看來外圍不出現向下突破走勢，港股不易大跌。
午市同大行老友食飯，叫買中信21世紀（241）。如無意外，中信21世紀隻輪會在3月22日掛牌買賣，早前隻「威士」有人高價收貨，0.60-0.80元水平買咗好多，加埋認購價0.10元，隻輪成本價去到0.70-0.90元咁高。
老友話，人哋肯咁博收集隻「威士」，相信冇1倍利潤唔會制，因此預計隻輪上市見1.40-1.80元並不為過。隻輪如果升到呢個價，以一般公司輪的合理溢價同槓桿率推算，正股大有機會升上3.70-4元。
老友重話中信21世紀除咗隻輪上市前後有得炒外，更要留意4月11日的大日子，嗰日係質檢網正式啟用並與國際知名客戶簽約的大日子，據聞王軍會親自到港主理。中信21世紀佔呢間合營公司50%權益，至於呢檔生意有冇前景，睇吓內地市場有幾多中外品牌需要打假，就盡在不言中。
趙飛雲食完飯之後睇過中信21世紀張圖，隻股近期累積升幅唔細，過去4日升咗14%，昨收3.175。睇番過往走勢，隻股每次展升浪都係連升10日8日的大超買特性，與一般股票走勢頗不同，不妨等股價稍回買入短炒，以5日線（今日上移至3元）止蝕，一於以小博大。
趙飛雲