噚日有報道話周國豐同利嘉兒（Lily）計劃喺今年拉埋天窗，不過兩位當事人嘅口供就完全唔夾，Lily在出席一個化妝品活動時就好決絕話冇咁嘅打算，佢重話如果真係結婚，就已經戴咗求婚戒指啦，又話以佢一個咁貪慕虛榮嘅人，一定唔會退出娛樂圈咁話。Lily重好抵死咁話放風嘅人一定唔係佢嘅朋友，而且佢覺得拍拖一年就結婚實在太快啦，起碼兩三年後先會考慮。
但奇怪嘅係佢男友周國豐就冇否認婚訊，噚日問到周國豐登記咗註冊未，佢就好冧咁叫大家唔好理，言語間佢洩露話問過啲堪輿學家，喺盲年入面都會有適合嫁娶嘅好日，但之後又補鑊話只係幫聽眾問。
事後，記者再同Lily講周國豐冇否認佢哋嘅婚訊，Lily就毫不留情咁話：「咁大家知個消息源自邊度啦，佢講到咁實，可能唔係同我結呢，或者一直都係我搞錯咗，總之佢就冇同我求過婚啦。」雖然佢兩個喺度耍花槍，不過佢哋都異口同聲話對方係理想嘅結婚對象。周國豐重話有嘢落實嘅話，就會喺節目度公布。
由金像影帝羅拔迪尼路（RobertDeNiro）創辦嘅紐約Tribeca電影節，安排喺下個月十九號揭幕，其中王家衞執導、梁朝偉主演嘅《2046》，獲邀請喺注目電影呢個組別入面放映，呢個組別嘅作品，都係一啲未公映或者未喺北美上映嘅電影。上年迪尼路曾經喺米蘭同偉仔見過面
郭可盈同陶大宇噚日到商台接受訪問，對於《心花放》收視比上周再升一點，佢哋異口同聲話不會看重收視，反而著重劇集口碑，郭可盈重笑住話連飲茶嗰陣，個廚師都以劇中名字叫佢，可見劇集好受歡迎。其實郭可盈同陶大宇這對老拍檔一向有收視保證，陶大宇話：「咁就證明我哋好襟擺，好多人都問過我哋會唔會悶，但係重work喎，所以都唔擔心。」
梅艷芳媽媽覃美金同大仔啟明噚日去新城接受薛家燕訪問，今日係梅媽生日，所以薛家燕就送咗個蛋糕畀佢，梅媽食蛋糕時，諗起阿梅過身年幾，忍唔住眼濕濕。另外，梅媽喺現場派聲明，澄清有報道話佢同周刊爆料講話香港杜莎夫人蠟像館幫阿梅造蠟像嘅事，梅媽話同蠟像館有協議，喺下星期二蠟像揭幕之前都會保密。
李玟（CoCo）近排忙緊宣傳英文唱片《Exposed》，據知呢張唱片嘅製作費高達八百萬港元，全亞洲四十八個電台重會同步播出新歌，CoCo用國語話：「光收歌就超過二百首，篩選到最後留在專輯中的，都是最好聽的。」
