喺政治因素唔多明朗環境之下，恒指高低波幅118點，埋單仍有進帳15點，咁嘅市情，都算穩定。中移動（941）盤數靚，繼續領升，進帳0.50元，兩日夾埋，升1.15元，短期或者仍有幾毫子上升空間，C輪未必跟足上去，追唔過。
中移動推動恒指31.6點，恒生（011）除息1.90元，由107元退至105元，表面跌2元，計埋除息因素，只係微跌0.10元，恒指俾佢拖低12.3點。滙控（005）勉強收128.50元，升0.50元，拉番高恒指17.9點。滙控明日除息2.10元，會拖低恒指75點。炒恒指C輪或P輪，要計埋呢個因素。炒恒指輪，其實最好睇住期指，期指變化已反映埋大藍籌嘅股息因素。即月期指低水90點，計埋滙控除息因素，實係只低水15點。
和黃C輪：和黃（013）最多跌過0.50元，最威亦只係升過0.50元，平收68元。暫時牛皮，若見忽然回軟，可以喺低位諗吓C輪，對象係3808，7月中到期，輪價32仙，溢價3.2%，槓桿率21.3倍（有效11.5倍），引伸波幅19.4%。想槓桿率大啲，則揀3561。3808昨日下跌1.5%，3561下跌4.7%。
太AC輪：太A（019）係昨日醒神大嘢，收65.50元，升0.75元。芬佬收集未完，值得繼續睇好。
收集太AC輪，3528係首選，11月尾到期，大把時間，輪價47.5仙，溢價3.3%，槓桿率13.8倍（有效8.4倍），引伸波幅17.4%。3773數據都好靚，弊在交投似有還無。
國壽P輪：國壽（2628）跌5仙，高溢價大槓桿率嘅C輪散得幾厲害，咪貪平博反彈。要博，博P輪3706。舊年國內股市唔得，國壽盤數好難令人滿意。
章盛