呢幾年香港人見慣風浪，高官問責破產，政治人物好似走馬燈，前任財政司司長梁錦松當年因涉偷步買車而落台，噚日佢出現信興集團主席蒙民偉嘅新書發布會，同前任廣播處處長張敏儀鬼咁好傾，重滿面春風，又話自己個女幾好幾聽話，但記者一問佢董建華辭職一事，佢立刻擰晒頭話：「唔關我事，唔講。」至於會唔會重入政府，佢話：「唔會再嚟過喇。」之後就喺其他人護送下行開。
八方喺度諗，董生、梁生、保安局前局長葉劉淑儀、衞生福利及食物局前局長楊永強，同埋前特首辦主任林煥光，呢班因為唔同理由辭職嘅人，其實可以組織番個舊電池聯誼會，得閒聚吓，憶述吓廢董時代嘅苦與樂，當初點樣俾佢呃咗上船，又或者一齊放長雙眼睇煲呔點衰，都好。
傳真︰2623-9278
電郵︰[email protected]